الكل العركجية....مع التحية
تحياتي للزحلاوي والشرقية وأبونؤاس حلوه لياليه
تحياتي لجرجيس و لميخا وللجاجيك واللبلبي الحار ميه
مشتاكين للعشا معلاك و كباب وريحان وبصل و الطماطه مشويه
للربع ملتمين مو الجن والتونيك
وللعرك بس مو من تصعد بلاويه
مشتاك أللمت الطيبين
أهل المضايف و العزوبيه
مشتاك للدارميات و المطاردات الشعريه وللبستات و الموالات والابوذيه
مشتاك لفريدة وشهرزاد موش بنيات
هاي البيره العراقيه
مشتاك لباجة الحاتي ومسكوف كطان لو بنية
مشتاك لحجي العراقيين
الكله حسجه و موده وحنية
مشتاك للسعدون للشورجه والرشيد للمنصور للشواكه والصالحيه
كل بغداد وديالى نازل الكوت
للعمارة للبصرة والطرب بالناصرية
مشتاك أتمشى بالكرادة عصريه وعصرية ماركة عركنا التجارية
بعشيقه يحبيب ما يتفخخ
ولا من هبهب تطلع الأرهابية
بعشيقه موصوف قبل العشا لو بعده
ربع ونص دوه للمهموم مو للحراميه
بعشيقه أذا يتوازه و ينفجر يتشظه بأحلام وردية
بعشيقه ربع منه يكشف كل دجال
همه بس الحكم وكراسيه
بعشيقة سعره فوك الفوك
عد أهل العمايم والريزخونيه
بعشيقة رفيج العشاق و الأفراح
مو أهل التفجيرات والدونيه
بعشيقة يطلبك بأعتذار
لن صفيته وي حقراء السلفيه
بعشيقه يتفخخ دوالغ
يفجرهه بس بروس العركجيه
بعشيقه لوما سكرته ومزته
جان أشكظى أم المعارك والقادسية
بعشيقه مصفى من أم العشك
و ماخوذ من رافد دجله ميه
بعشيقه ألتهدد بيه معروف
لا هو عميل ولا من مغاوير الداخليه
بعشيقه ميه زلال مقطر
صافي ويصفي النيه
بعشيقه أصحابه خوش أصحاب
مو سكارى بس دايخين شويه
بعشيقه معروف أيهدأ لعب
منين هالأرهاب ولا وين تاليه
بعشيقة مو همه يقتل طفل
و لا يفجر روضه و أبتدائيه
بعشيقه ما يذبح رجل
لو يعتدي على حرمه عراقيه
بعشيقة مو مشروب عادي
عالمحلات مكتوب مشروبات روحيه
بعشيقة و العرك يفتخرون
بكل العهود مسجلين منتوجات وطنيه
هذا حليب سباع مو شربت الواويه
هذا حليب سباع مو شربت الواويه
مع تحيات أخوك
أبو شهد
الاخ العزيز ابو شهد
تحياتي
تخشى الاخت العزيزة ام شهد ان يزداد اشتياقك الى وطن البعشيقة والمفخخات وترحل لتستعيد بعضا مما مضى, وتتركها مشغولة البال عليك, ولهذا ورغم انني لست شاعرا الا انني كتبت لك هذه السطور المتواضعة بلسان حالها .
تقول
للبعشيقه لا تشتاق اجل شوكك شويه
ماضاع البطل منك البطل وياك يوميه
ادري الشوك للمفطوم ولمفارك المميه
واذا جانت حجتك جاجيك اسويلك الف جاجيك بايديه
ولبلبي بمي الدجاج وكباب وتكه مشويه
بس اطلب يابعد الرروح مادام النفس بيه
و ميخا التعرفه عزل محله وشال وباره تحول حسينيه
اكعد يروحي اتهده بالرحمن يازينة الصابرين يا ابو العقلانيه
واشتاك اعله كيفك بعد ثلث اسنين لمن ناخذ الجنسيه
ى
موضوع: الى كل العركجية ٠٠٠ مع التحية 
18/1/2012, 10:45 am
