انا والحراميه
بقلم الفنان المسرحي زيا ديشو البازي
فد يوم صبحيه
براس الفرع لاكتني دوريه
قسم لابسين ملابس مدنيه
ثلاثه لو اربعه انضباطيه
واحد لابس منقط او حاطله بيريه صاح بيه
تعال لاك شوفلي الهويه !؟انطيته كل اوراقي
كتله هاي بطاقتي الشخصيه
هاي الاحوال المدنيه
هاي البطاقه التموينيه
هاي الورقه استلم بيهه الطحين شهريه
هاي شهادتي المدرسيه
خريج كليه قسم السلام للانسانيه
او هاي شهادتي الجنسيه
تاكد ان ابوي عراقي وامي عراقيه
كال لعد ليش مكتوب بخانتل القوميه اثوريه
مبين انته مزور الجنسيه
كتله لا عمي هاي الاصليه
أذا ما تصدك اتصل بالمديريه
هومه يكلولك اذا مزوره لو حقيقيه
كام فتش بجيوبي وباك الخرجيه
او لكه(وجد) شويت صور شخصيه
كال منو ذوله اكيد فراريه(هاربين من الخدمة العسكرية)
كتله لا خالي هاذا ابن عمي استشهد بالجبهه الشرقيه
وهاذا اخوي استشهد بالقادسيه
وهاذا صديقي استشهد من اجل الامه العربيه
كال ذوله(هؤلاء) الثلاثه منو مبين عليهم افنديه
كتله هاذا يوسف وهاذا يوخنا
وهاذا يوبرت ترك زوجه كلهه طيبه او حنيه
او طفلين بعدهم بالدوديه
ذوله هم شهداء بس ذوله(هؤلاء) استشهدو من اجل قضيه
وله احفاد اغا بطرس
امتدادهم من سميل وصوريه
كال كافي اني ما اعرف هذة الشغلات التاريخيه
بس الذى اعرفه اتو الاثوريه
كولكم(جميعكم) جواسيس للامبرياليه
انتو(أنتم) اصلن مو عراقيه
كتله لعد اشور وسنحاريب وحمورابي منين
من الصين الشعبيه
او سومر وبابل واكد ونينوى منو بناها
شركه يابانيه
تعال فهم هيج متخلف العقليه
حسيت بعد ما اكدر اعيش ويه الحراميه
شكيت كل اوراقي و رحت للسفاره الكنديه